Muspaypihina kawsayniykuqa manam chayllapichu takyarqa. Chaynalla tiyachkaptiykum, huk tuta, imay urachá karqa, Lucindallayqa qaparistin qunqayllamanta rikcharirurqa:
–Kuyasqalláy, imataq pasasunki? –nispam ñuqapas rikchariruspay akchita ratachirqani.
Lucindallayta akchipi qawaykuptiyqa waqakullachkasqa, chikachaq mancharisqa, tukuy kuwirpullanpas katkatatastin.
–Miskillataña puñukuchkaptiymi chay wawa kuwartunchikman yaykuramusqa. Patintichatam rikurqani lluqastin hamuchkaqta, chaymantaqa puñusqanchikman chayaramuspanmi iskay makichanwan kawitupa patanpi hapipakuspan sayarirurqa. Hinaspam, Lucaslláy, asichakustin, rimapayawastinhina llampulla makichanwan, ñuñuyta maskaykurqa.
